2012-09-28 13:05
Johannesburg – Die veroordeelde moordenaar Clive Derby-Lewis se vrou het aansoek om sy mediese parool gedoen, het ‘n koerant berig.
Beeld berig die moordenaar se prokureur, Marius Coertze, het gesê sy vrou, Gaye Derby-Lewis, het aansoek om mediese parool gedoen.
Coertze het bygevoeg dat mev. Derby-Lewis die aansoek met die media sal bespreek.
Die provinsiale departement van korrektiewe dienste kon nie onmiddellik vir kommentaar bereik word nie.
Mev. Derby-Lewis het verlede maand gesê sy sal die dokumente vir die aansoek indien, aangesien haar man aan kanker en gangreen in een been ly.
Mnr. Derby-Lewis (76) is verlede jaar normale parool geweier.
Die parlementslid van die apartheid-era se Konserwatiewe Party is tot 25 jaar tronkstraf gevonnis vir sy aandeel in die moord op Chris Hani, sekretarisgeneraal van die Suid-Afrikaanse Kommunisteparty, in 1993.
Hy het die vuurwapen aan Janusz Walus, wat dieselfde straf uitdien, verskaf.
Beide Walus en Derby-Lewis is aanvanklik die doodstraf opgelê. Hul vonnisse is later na lewenslange tronkstraf omgesit nadat die doodstraf afgeskaf is.
http://afrikaans.news24.com/Suid-Afrika/Nuus/Derby-Lewis-se-vrou-doen-aansoek-om-mediese-parool-20120928
No comments:
Post a Comment