Mugabe-militantes uit oorde gejaag

Harare - Zimbabwiese polisie het sogenoemde oorlogsveterane en ondersteuners van pres. Robert Mugabe uit toeriste-oorde gejaag na die militantes hulself as die oorde se nuwe eienaars voorgedoen het.

Die onwettige beslagneming wes van die hoofstad, Harare, is die nuutste voorval in Mugabe se poging tot landhervorming wat in 2000 geloods is.

Minister Jameson Tima het egter gesê dié beslagnemings is onwettig en het polisie ingeroep om die klopjag te ontlont.

“Hulle is deur polisie uitgejaag,” het Timba, ‘n lid van die Movement for Democratic Change (MDC), gesê.

“Daar was sowat 200 van hulle. Gelukkig is daar geen skade aan die eiendomme aangerig nie,” het Timba gesê.

Zanu-PF, wat in ‘n magsdeelooreenkoms die land saam met die MDC regeer, het enige skuld in die voorval ontken.

“Die oortreding kon nie deur ons lede wees nie,” het Ignatius Chombo, aan die hoof van Zanu-PF se poging tot landhervorming, aan die staat se Herald koerant gesê.

“Zanu-PF sal nie sulke gedrag duld nie,” het Chombo, ook minister van plaaslike regering, gesê.

http://www.nuus24.com/Afrika/Nuus/Mugabe-militantes-uit-oorde-gejaag-20110124